ဖာတစ်တန်
အထုပ်တစ်ဖက်ထမ်းပါလို့ 
အညာပြန်
ရုတ်တရက်မလှမ်းချင်ဘု
နှုတ်ဆက်စမ်းချင်လို့ လာခဲ့တယ်
(သခင်ကိုယ်တော်မှိုင်း)
ဒီဇင်ဘာလ ၂၆ ရက်နေ့ ကအညာရပ်ဆီ ခရီးဆန့် ခဲ့ပါတယ်။
ရေနံချောင်းကိုပေါ့ဗျာ...ဘယ်ကိုဖြစ်ရမလဲ
အောင်မင်္ဂလာအဝေးပြေးကွင်းကို ဖုန်းဆက်လက်မှတ်မှာထားတာ၊ထိပ်တန်းဂိတ်ကိုပါ။
အနားရောက်မှရှေ့ တစ်ရက်ထပ်စောလိုက်တော့ အဆင်မှပြေပါ့မလားပေါ့လေ။
ရတယ်ဗျို့ ။နေရာကောင်းကို ပေးတယ်။ကိုယ်ကလည်းကြေး(ဂျီး)များများရယ်။
အဝေးပြေးကားစီးရင် ရှေ့ နားကခုံတွေပဲစီးချင်တယ်။ဒရိုင်ဘာနောက်တည့်တည့်လည်းဖြစ်ချင်တာကိုး။
ဘာလို့ လဲလို့ တော့မမေးနဲ့ ပေါ့ခင်ဗျာ။
ရန်ကုန်ထိပ်တန်းဂိတ်ကို ကျေးဇူးတင်ပါတယ်။ဝန်ဆောင်မှုအတွက်ကျေနပ်ရပါတယ်။ဝယ်စရာတွေဝယ်ပြီး
ဂိတ်ကို ၃ နာရီအရောက်သွားရတယ်ဗျို့ ။လက်မှတ်ဖိုးရှင်းဖို့ စောသွားရပါတယ်။
၇၅၀၀ နဲ့ နှစ်ယောက်တွက် ၁၅၀၀၀...ဈေးတော့အချိုသားဗျ..။
မိုင်၃၅၀ လောက်ကို ၇၅၀၀ ပဲကျတယ်။၃မိုင်ပဲဝေးတဲ့ တက္ကစီက ၃၀၀၀ ပေးရတာမနိပ်ဘူး။
ကားပေါ်ရောက်တော့..ရေသန့် တစ်ဗူးစီနဲ့ စနိုးတာဝါ တစ်ခုစီဝေသေးသဗျ..ဟေး..ဟေး..။
ရေသန့် ၅၀၀ မီလီလီတာကတော့ ကားလိုင်းတံဆိပ်နဲ့ သောက်ရတာအဆင်ပြေတယ်။
စနိုးတာဝါက ရေမွှေးနံ့ အတော်လေးပြင်းလွန်းလို့ မသုံးနိုင်ဘူးဗျို့ ။
အားရပါးရသုတ်လိုက်တာ အော်ဂလီဆန်သွားတယ်။အားတော့နာပါရဲ့ ..ဟီး..။
ညနေ၄နာရီလောက်မှာကားစထွက်ပါတယ်။ကားက နဲနဲတော့ဟောင်းနေပါပြီ...စက်ပိုင်းတော့
မဆိုးပါဘူး ။လွန်ခဲ့တဲ့နှစ်၂၀ ကျော်ကျော်ကတည်းက ဂျပန်ကတက္ကသိုလ်တစ်ခုမှာတာဝန်ကျေပြီးသားကားပဲ
ကောင်းတာပေါ့။၁၆း၄၅ လောက်မှော်ဘီမှာ ဆီဝင်ဖြည့်တယ်ဗျ။
ညနေ ၁၉း၃၀လောက်ထမင်းစားနားတယ်ခင်ဗျ... ဘယ်နေရာလည်းတော့မသိပေဘူးပေါ့ဗျာ။
ဆိုင်နာမည်ကဖြိုးသိင်္ဂီ(အင်းမအနီး)ထင်ပါတယ်....သိတဲ့လူလည်းပြောပါအုံး..ဘယ်နေရာဆိုတာကို။
ထမင်းတစ်ပွဲ ၁၅၀၀ ကျွန်တော်ဝက်သားနဲ့ အုပ်ခဲ့တယ်။
ဝက်ကတော့ ဟင်းအိုးနားဖြတ်အသွား ချက်ချင်းအသတ်ခံရ..အချက်ခံရပုံပါပဲ။
အမွှေးနှုတ်မထားသလိုပဲဗျ။ကျွန်တော်တို့ နှစ်ယောက် စကားဟဟ မပြောပဲစားခဲ့ရတယ်။
ဘာလို့ လဲဆိုတော့ စကားပြောရင်းရန်ဖြစ်မှာဆိုးလို့ ။ရန်ဖြစ်ကြလို့  အချင်းချင်းထမင်းနဲ့ ကောက်ပေါက်ရင်
ထိပ်ပေါက်ခေါင်းကွဲ ဖြစ်နိုင်တယ်ခင်ဗျ။အတော်မာတာခင်ဗျ။ရေခဲသေတ္တာထဲကထုတ်လာသလို
အေးနေသေးတော့ ပိုဆိုးတာပေါ့ခင်ဗျာ။ဟင်းအရံ တွေကလည်း မနက်ကဆွမ်းတော်တင်ထားသလိုပဲခင်ဗျ..ဟီး..။
ဒီလိုနဲ့ ပြီးအောင်စားသောက်ခဲ့ရပါတယ်....ပြည်ဂျီတီအိုင် အဆောင်မှာတောင် တစ်နှစ်စားခဲ့သေးတာ..ရပါတယ်။
ဒီထမင်းဝင်အောင်စားတတ်ပါတယ်။အဆောင်တုန်းကတော့ ကန်စွန်းရွက်ကြော်ဆိုရင် မြက်အရင်ဖယ် ပြီးမှစား
ရတာလေ။ကြက်ဥဟင်းဆိုတာ ..ဘယ်နည်းနဲ့ ချက်မှန်းမသိရဘူး...ကြက်ဥကိုကြော်ထားတယ်ဗျ ပြီးတော့
ဘယ်လိုဖေါ်စပ် ချက်ပြုတ်ထားမှန်းမသိရတဲ့ ဟင်းအနှစ်ထဲ ထည့်ထားတယ်ဗျ..ထူးဆန်းပါပေ့ ဆရာတွတ်ရယ်...။
ပြောရင်းသွားရည်ကျလာပြီ...ဂလု...။ထားပါတော့...
စားသောက်ပြီးကားပေါ်တက် ..ခရီးဆက်..ရွှေတောင်ရောက်တော့ ကားဘီးလေလျှော့လို့  တစ်လုံးလဲတပ်။
ဒီလိုနဲ့ ပြည်ကိုဝင်တော့မယ် “ပြည်မြို့ ”ဆိုတဲ့ ဆိုင်းဘုတ်လည်းတွေ့ ရော မိဘရင်ခွင်ဟောင်းကို ပြန်ဝင်ရသလို
ခံစားရသဗျ။ဒီပြည်မြို့ က ကျွန်တော်တို့ ကို အသစ်တဖန်မွေးထုတ်ပေးခဲ့ တာဗျ..ဟုတ်တယ်မလား..။
အမေကမွေးတာ ပထမဘဝ...ပြည်ဂျီတီအိုင်ကမွေးတာဒုတိယဘဝ..လေ..။
ရွှေဆံတော်ကို ဦးတော်တင်ရချည်သေးရဲ့ ပေါ့လေ။အယ်...ဘယ်မှာတင်ရလို့ တုန်း...ဆိုင်းဘုတ်ကြီးနားရောက်မှ
ညာကွေ့ ပြီး မြို့ ရှောင်လမ်းထဲဝင်သွားတယ်...။လမ်းကလည်း ရန်ကုန်ပြည်လမ်းလိုမဟုတ်တော့..ကားတစ်စီးလုံးသံစုံ
တီးဝိုင်းကျနေတာပဲ။တံခါးမှန်ချပ်တွေက ခါပြီးတဝုန်းဝုန်းမြည်နေတာပါပဲ။၁၀မိနစ်လောက်ကြာမှ မြို့ သစ်ဘက်ကပတ်ဝင်ပြီး အဝေးပြေးကွင်း
ဘေးကဖြတ်ပြီး အရင်ကျောင်းသွား၊မြို့ သစ်ဈေးသွားနေကြ လမ်းထဲဝင်သွားတယ်။
တို့ ကျောင်းကြီးကိုအခြားနာမည်တစ်ခုနဲ့ တွေ့ ရတော့...အဖေအရင်းကို နောက်အိမ်ထောင်နဲ့ အတူတွေ့ 
ရသလိုပါပဲ။ဝမ်းတော့နည်းမိသား။ဘာတတ်နိုင်မှာလည်း။လက်ရှိဘဝမှာပဲကျရာတာဝန်ကျေပွန်ပါစေ
လို့ ဆုမွန်ချွေရတာပ။ဒီလိုနဲ့ ည၁၂ နာရီလောက်မှာအောင်လံရောက်ခဲ့ပါတယ်။ရွှေမိုးလက်ထက်ရည်ဆိုင်မှာ
ခေတ္တနား လက်ထက်ရည်သောက်ပေါ့။အောင်လံကတော့ တွေ့ ခဲ့သမျှမြို့ တွေထဲ မြို့ အလျှားအရှည်ဆုံးပဲဗျို့ ။
အောင်လံကထွက်တော့ အိပ်မပျော်ချင်တော့ဘူး..ဆင်ပေါင်ဝဲမြို့နယ် နိမိတ်ထဲဖြတ်တော့..ကန်နှစ်ဆင့်က ထမင်းဆိုင်ကို
ရှာကြည့်မိသေး..မှောင်နေလို့ လားမသိ..မတွေ့ ရတော့။သြော်ဂျီတီအိုင်တက်တုန်းက အမြဲစားနေကြကိုး..။
ကိုးပင်ကိုရောက်တော့ တောင်တွင်းကြီးမြို့ ဘက်ကိုဆက်မသွားဘူး ။မကွေး သစ်ရာကောက်ဘက်ကို ဖြတ်လမ်းက
ဖြတ်တယ်။လမ်းကတော့ တကယ့်လမ်းမှဟုတ်ပါလေစကွယ်။Express ကားက တစ်နာရီ ၁၅မိုင်လောက်ပဲ
မောင်းလို့ ရတော့တယ် ။ဆိုးလိုက်တဲ့ ဘာမှခင်းမထားတဲ့လမ်း...ဖုန်တွေက မနည်းမနောပဲလေ။
မနက်၎နာရီလောက်မှာမကွေး အဝေးပြေးကွင်းကိုရောက်ပါတယ်...ထိပ်တန်းက ရန်ကုန်-မကွေး-ရေနံချောင်း-မန္တလေး
ဆွဲတာပါ။ရန်ကုန်ကနေရေနံချောင်းထိနဲ့ ၊မကွေးကနေ မန္တလေးအထိပါ။ကျွန်းဆွယ်ကားလိုင်းလည်းအတူတူပါပဲ။
ခရီးဆက်လာလိုက်တာ ၄း၄၀လောက်ဒေါင်းသေချောင်းကိုရောက်ပါတယ်။တံတားဆောက်နေတာကိုတွေ့ ရတော့
ဝမ်းသာမိပါတယ်။မနက်၀၅း၃၀ လောက် ရေနံချောင်းမြို့ ထဲရောက် ကားပေါ်ကဆင်း...ဟမ်မရေး....အေးလိုက်တာ...
တစ်ခါတစ်ခေါက်ရောက်ခဲ့ပြန်ပြီ မွေးရပ်မြေ။
No comments:
Post a Comment